Is-Sirja tinsab f’nofs ġlied settarju li dejjem jikber, b’rapporti ta’ massakri kontra l-komunitajiet Alawiti u Nsara wara t-tneħħija tal-President Bashar al-Assad. Filwaqt li mijiet ta’ persuni tilfu ħajjithom u eluf oħra ġew spostati, l-Unjoni Ewropea (UE) għamlet pass kontroversjali billi stiednet rappreżentant tal-gvern Sirjan għal taħditiet f’Brussell.
Ġlied aħrax fil-provinċja ta’ Latakia, territorju għal ħafna Alawiti. Gruppijiet armati, inkluż militanti Sunniti leali għall-gvern il-ġdid, qed jiġu akkużati li wettqu massakri f’raħal wara l-ieħor. Rapporti juru li aktar minn 745 ċivili Alawiti nqatlu, b’340 minnhom eżegwiti f’djarhom.
Komunitajiet Insara wkoll ġew attakkati, f’ċerti reġjuni taħt assedju sħiħ.
Wara t-tmiem tar-reġim ta’ Assad, ħafna komunitajiet Sunniti — li sofrew taħt il-mexxej ta’ qabel — qed imexxu attakki kontra l-Alawiti, li huma meqjusa bħala appoġġ għar-reġim preċedenti. Barra minn hekk, hemm rapporti li gruppi barranin, inklużi militanti Turkmeni u Ċeċeni, qed jieħdu sehem fl-attakki.
F’dan il-kuntest ikrah, il-UE ħabbret li stiednet lill-Ministru tal-Affarijiet Barranin Sirjan, Asaad al-Shibani, biex jattendi summit f’Brussell fit-17 ta’ Marzu. Din hija l-ewwel darba li uffiċjal mill-gvern Sirjan il-ġdid ġie mistieden għal laqgħa Ewropea.
Dan il-pass huwa parti minn sforz biex jinżammu kuntatti diplomatiċi mal-gvern il-ġdid Sirjan, immexxi minn Ahmed al-Sharaa. Madankollu, il-UE għamlet ċar li l-għajnuna u t-tneħħija ta’ sanzjonijiet se jkunu dipendenti fuq garanziji dwar id-drittijiet tal-bniedem u l-protezzjoni tal-minoranza
Ir-Russja, alleat storiku tar-reġim ta’ Assad, ikkundannat lill-mexxejja l-ġodda tas-Sirja waqt laqgħa magħluqa tan-NU, u wissiet li l-qerda tal-Alawiti tista’ tkun paragunabbli mal-ġenoċidju tar-Rwanda.
Sadanittant, eluf ta’ ċivili qed jaħarbu minn djarhom, b’kriżi umanitarja imminenti. Għalkemm hemm sejħiet għal paċi, il-ġlied u l-massakri jidhru li għadhom ‘il bogħod milli jieqfu.
L-istorja tas-Sirja, diġà mgħobbija b’għexieren ta’ snin ta’ gwerra, tidher li daħlet f’fażi ġdida u aktar mudlama ta’ vjolenza settarja.
