L-Impatt li qed jħalli l-storbju eċessiv u t-turiżmu

“Operaturi fil-qasam tat-turiżmu għandhom jaraw li l-attivitajiet tagħhom ma jħallux impatt negattiv fuq il-komunitajiet residenzjali li fiha jkunu qegħdin jaħdmu. Dan hu meħtieġ speċjalment fi gżira żgħira bħalma hija tagħna biex jassigura li t-turiżmu jkun wieħed sostenibbli.” Dan sostnieh iċ-Chairperson tal-ADPD – The Green Party, Carmel Cacopardo, meta indirizza konferenza stampa is-Sibt filgħodu fil-Belt Valletta.

“Qegħdin kontinwament nirċievu ilmenti minn residenti f’diversi lokalitajiet li xi uħud mill-istabbilimenti tad-divertiment m’għandhom l-ebda rispett lejn il-ġirien tagħhom. Idoqqu mużika b’volum għoli sa tard bil-lejl.” Il-kelliem tal-ADPD Marcus Lauri saħaq li dan qiegħed iseħħ f’numru ta’ postijiet mhux biss il-Belt.

“Il-Ministru tat-Turiżmu mhuwiex qed jagħti każ il-ħtiġijiet tar-residenti imma minflok soluzzjonijiet qiegħed iżid in-numru ta’ siegħat li tindaqq il-mużika fil-Belt. Il-problema f’pajjiżna,” tenna Lauri,” hija in-nuqqas ta’ regolamenti xierqa, u l-kultura ta’ nuqqas t’infurzar. Il-pulizija m’għandhomx l-istrumenti legali li bihom jistgħu jinfurzaw ir-regolamenti b’mod effettiv. Għandna biss l-inkompetenza tal-Malta Tourism Authority (l-MTA) bħala regolatur.”

“Il-Ministru Clayton Bartolo flok talab lit-tim tal-infurzar fl-MTA biex jara li l-istabbilmenti fil-Belt qegħdin jirrispettaw lir-residenti ċeda għal pressjoni mill-operaturi u żied il-ħinijiet li dawn jistgħu idoqqu mużika b’volum għoli mill-11pm sas-1am.”

“Hemm min isostni li m’hawn imkien fid-dinja fejn il-mużika fit-triq f’żoni residenzjali hija regolata jew saħansitra mhux permissibli wara l-11pm. Din hija falsita’. Hemm numru ta’ bliet b’regolamenti ċari ta’ limiti ta’ ħoss li wieħed jista’ jagħmel, fejn saħansitra jintalab li jkun hemm sound proofing adegwat fejn il-mużika tkun se tindaqq. Dawn huma l-idejat li l-Ministru Bartolo għandu jikkunsidra,” temm Lauri.

Il-Perit Carmel Cacopardo spjega li l-ħoss jibda’ jkun ta’ inkovenjent meta jaqbeż il-75 dB u ta’ periklu meta jilħaq madwar 120 dB. Biex wieħed jikkompara, konversazzjoni f’librerija tkun bejn 10 u 30dB filwaqt li dik normali jew ħoss ġġenerat minn appliances fid-dar tkun bejn 30 u 50 dB.

“Jekk wieħed jikkonsidra destinazzjonijiet turistiċi li jikkompetulna fil-Mediterran – Barċellona u Ibiża, wieħed isib li hemmhekk il-livel ta’ ħoss huwa ikkontrollat b’mod strett biex jassigura li l-istabbiliment qegħdin jimxu ma kriterji stabilliti ta’ sound proofing u li jiggarantixxu d-dritt tar-residenti lokali għal mistrieħ.

Huwa assolutament mhux veru li f’destinazzjonijiet turistiċi oħra kulħadd jista’ jagħmel li jrid. L-idea li il-ftit jiggwadanjaw a spejjeż tal-kumplament hija biss mentalita’ li tinsab fl-imħuħ servili tal-Malta Tourism Authority li hija bla snien għax hi ikkontrollata mill-industrija stess.

Il-kejl użat għandu jkun wieħed: li jkun inkoraġġit dak li hu raġonevoli fil-konfront tar-residenti,” sostna Cacopardo. “Hawn wieħed jrid jikkonsidra ukoll l-impatti soċjali u ambjentali tat-turiżmu. Għalhekk, tqum il-mistoqsija: kemm nifilħu turisti?”

“L-interessi konfliġġenti fil-qasam tat-turiżmu għandhom jiġu indirizzati billi l-iżvilupp f’dan il-qasam ikun demokratizzat. Riżultat ta’ hekk min sal-lum hu mdorri jħares biss lejn il-gwadann fi żmien qasir ikollu jibda jqis ħidmietu f’kuntest ta’ responsabbilta’ soċjali, kif ukoll id-dannu ambjentali u kulturali ta’ ħidmietu. Sallum, l-operaturi fil-qasam tat-turiżmu jieħdu l-profitti filwaqt li l-kumplament tas-soċjeta’ iġgorr l-impatti fuq spallejha.

Il-proċess li bih jittieħdu deċiżjonijiet dwar żvilupp fil-qasam turistiku għandhom ikunu suġġetti għal aktar skrutinju pubbliku mill-kommunitajiet li qegħdin ibagħtu mill-impatti tal-attivita’ li tiġi ġġenerata. Huwa importanti li x-xewqat tal-komunita’ mhux biss jinstemgħu imma tittieħed azzjoni dwarhom,” temm Cacopardo.