New Jersey, l-Istati Uniti – Kumpanija Amerikana, LinusBio, nediet test ġdid bl-isem ClearStrand-ASD biex jgħin lit-tobba jaraw jekk it-tfal bejn xahar u tliet snin jistgħux ikunu fuq l-ispettru tal-awtiżmu. Dan it-test mhux jagħti dijanjosi, imma jista’ jgħin biex jiġi eskluż l-awtiżmu.
Kif Jaħdem?
ClearStrand-ASD jeħtieġ biss kampjun żgħir ta’ xagħar mit-tifel jew tifla. Il-laboratorju janalizza dan ix-xagħar biex jara jekk hemmx sinjali relatati mal-awtiżmu. Riżultat negattiv ifisser li t-tifel jew tifla mhumiex x’aktarx fuq l-ispettru tal-awtiżmu. Jekk ir-riżultat ma jkunx negattiv, il-ġenituri jistgħu jikkonsultaw tabib għal aktar testijiet.
Minn Fejn Tista’ Tagħmel Dan it-Test?
It-test irid jiġi ordnat minn tabib u skont l-informazzjoni disponibbli, it-test ClearStrand-ASD bħalissa huwa disponibbli f’44 stat fl-Istati Uniti, iżda mhux f’Kalifornja, Hawaii, Maryland, New York, Pennsylvania, Rhode Island, u Washington D.C, u m’hemm l-ebda indikazzjoni li dan it-test huwa disponibbli fl-Ewropa bħalissa. Il-ġenituri jistgħu wkoll jitolbu dan it-test online u jirċievu l-kits id-dar tagħhom. Ir-riżultati joħorġu fi żmien tliet ġimgħat.
Għaliex Huwa Importanti?
Jekk awtiżmu jinqabad kmieni, it-tfal jistgħu jirċievu għajnuna aktar malajr, li tista’ tgħinhom jiżviluppaw ħiliet aħjar fil-komunikazzjoni u l-imġiba.
