Proposta biex bungalow oħra tinbidel fi blokka ta’
appartamenti ta’ 7 sulari
L-Awtorità tal-Ippjanar irċeviet applikazzjoni ġdida biex bungalow fi Triq il- Pwales fix-Xemxija tinbidel fi blokka ta’ appartamenti ta’ seba’ sulari
quddiem ir-Riserva Naturali tas-Simar. Dan qed iseħħ ftit ġimgħat biss wara
l-konferenza tal-aħbarijiet imsejħa minn BirdLife Malta b’rabta mal- approvazzjoni bla sens ta’ żewġ applikazzjonijiet oħra tal-ippjanar li huma
simili. Aktar kmieni f’Ġunju, BirdLife Malta kienet ikkundannat lill-Awtorità tal-Ippjanar (PA) talli qed toħroġ il-permessi biex isiru żviluppi bħal dawn waqt li kkritikat ukoll lill-Awtorità għall-Ambjent u r-Riżorsi (ERA) wara li ma tantx esprimiet tħassib fuq din il-materja. F’konferenza tal-aħbarijiet fit-8 ta’ Ġunju, BirdLife Malta kienet ippubblikat
ukoll photomontage li turi kif qed jirriskjaw li jinbidlu l-inħawi ta’ Triq il- Pwales, ftit passi ’l bogħod mid-daħla tar-Riserva Naturali tas-Simar.
B’reazzjoni għal dan, l-Awtorità tal-Ippjanar kienet ħarġet stqarrija biex tgħid li l-photomontage huwa qarrieqi u akkużat lil BirdLife Malta li qed tħawwad lin-nies dwar x’jista’ jfisser l-iżvilupp approvat. Madanakollu,
għaddew biss ftit ġimgħat u dak li antiċipajna qed isir realtà, b’din l- applikazzjoni ġdida bin-numru PA/03475/23 li d-deċiżjoni dwarha
mistennija tittieħed f’Ottubru. Il-proposta l-ġdida, imressqa minn Innovative Design Architects, tipprova tpinġi dan l-iżvilupp bħala sempliċi żieda ta’ sulari u modifikazzjonijiet f’maisonette, imma d-disinji li faċilment jinstabu online fuq is-sit elettroniku tal-Awtorità tal-Ippjanar juru li din hija tkomplija tat-trasformazzjoni kompleta ta’ bungalows fi blokok ta’ appartamenti, tefgħa ta’ ġebla ’l bogħod mis-Simar, essenzjalment kif urejna fil-photomontage. Filwaqt li nnutat li l-ERA ma ħadet l-ebda pożizzjoni dwar dan, BirdLife Malta x-xahar li għadda kitbet lill-Kap Eżekuttiv tal-ERA Kevin Mercieca u staqsiet speċifikament lill-awtorità tal-ambjent biex tiddikjara l-pożizzjoni tagħha fuq l-iżvilupp propost biex wara kollox tħares lir-riserva naturali li
tifforma parti min-netwerk Natura 2000 ta’ Malta. Ir-risposta tal-ERA, li ddaħħlet ilbieraħ, tisħaq biss fuq tniġġis mid-dawl meta l-iżvilupp ikun lest, u ma tindirizzax impatti potenzjali oħra bħal dawk waqt il-kostruzzjoni, minħabba li l-inħawi diġà huma skedati għall-iżvilupp. Il-Kap tal-Immaniġġjar tal-Art ta’ BirdLife Malta Mark Gauci kkummenta: “Ftit ġimgħat biss wara li għamilna din il-kwistjoni pubblika, qed naraw iseħħ dak li konna qed nibżgħu li se jiġri. Taqta’ qalbek tara riserva naturali tiġi soġġetta għal intensifikazzjoni tal-iżvilupp bieb ma’ bieb magħha, aktar u aktar meta tara li l-awtoritajiet responsabbli ma tantx għandhom interess li jirranġaw is-sitwazzjoni”. Il-perjodu tar-rappreżentazzjonijiet għall-iżvilupp propost jiskadi fl-14 ta’ Lulju u dawk li jixtiequ joġġezzjonaw jistgħu jressqu l-ilmenti tagħhom permezz tas-sit elettroniku tal-Awtorità tal-Ippjanar hawnhekk. Sadanittant, BirdLife Malta ressqet l-oġġezzjoni tagħha għal dan l-iżvilupp, u
qajmet it-tħassib tagħha dwar l-impatti li l-iżvilupp propost se jkollu fuq ir- riserva waqt l-istadju tal-kostruzzjoni u anke fil-fażi operattiva, b’theddida
ċara għall-valur kemm ekoloġiku u anke edukattiv ta’ din l-art mistagħdra protetta. “Aħna se nibqgħu noġġezzjonaw għal dan l-iżvilupp u għal kull żvilupp ieħor li jpoġġi fil-periklu dak li essenzjalment huwa l-patrimonju naturali tagħna li qed jittieħed a skapitu ta’ inizjattivi biex ħaddieħor jagħmel il-flus. L-ERA rrassenjat ruħha għal dan l-iżvilupp għax jinsab f’żona skedata. Minflok
taġixxi fuq il-kwistjoni billi tindirizza applikazzjoni waħda wara l-oħra, l- ERA qiegħda sempliċiment tkun spettatur,” kompla jikkummenta l-Kap tal- Konservazzjoni ta’ BirdLife Malta Nicholas Barbara.
Fl-aktar applikazzjoni riċenti approvata għal żvilupp qrib is-Simar, l- Awtorità tal-Ippjanar kienet ħadet nota tal-fatt li ma kien hemm l-ebda
oġġezzjoni min-naħa tal-ERA, li kienet qanqlet biss tħassib dwar il- possibbiltà ta’ tniġġis mid-dawl u injorat għalkollox l-impatti mill- kostruzzjoni u l-akkumulazzjoni ta’ residenti f’żona maġenb ir-riserva
naturali. Periti kienu argumentaw li ladarba kienu diġà ġew approvati appartamenti fl-istess triq, applikazzjonijiet oħra m’għandhomx jiġu ttrattati b’mod differenti. Madankollu, f’żewġ deċiżjonijiet riċenti dwar żvilupp f’żoni
ODZ (Outside Development Zone) u UCA (Urban Conservation Area), il- Kummissjoni għall-Ippjanar fi ħdan il-PA għamlitha ċara fiż-żewġ każi li l- approvazzjoni ta’ żvilupp mod ma jfissirx l-istess għall-bqija. Il-kwistjoni fl- inħawi tas-Simar tibqa’ primarjament it-tħaddim ħażin tal-policies tal- ippjanar li BirdLife Malta se tkun qed tikkontesta quddiem tribunal.
